 |
| ကဗျာဆရာ မောင်နီမွန် |
ကဗျာမောင်နီမွန်
၇၂ - နှစ်ပြည့် မွေးနေ့ အမှတ်တရ
_______________________
ထူးထူးခြားခြားပေါ့လေ
ရာဇဝင်မှာရောဂန္ထဝင်မှာပါ
ခေတ်ပြိုင်အတွဲတွေကိုသတိပြုမိတယ် ။
ကောက်ကာငင်ကာပြောရရင်
မတ်နဲ့အိန်ဂျယ်
မော်နဲ့ချူ
ဇော်နဲ့ဝဏ်
မေနဲ့မြိုင်
အစရှိသဖြင့်ပေါ့လေ ။
တောင်ငူမြို့ရဲ့ကဗျာတစ်ခေတ်မှာတော့
ကေတုဘုန်းမော်နဲ့မောင်နီမွန်ဆိုတာ
စွယ်တော်ရွက်လို ဒိုင်းနဲ့ဓားလို
တွဲဖက်ညီတဲ့အိုးစားဖက်တွေပေါ့ ။
ခုတော့ဖြင့်ဦးဘုန်းမော်အလွန်မှာ
ဦးနီမွန်တစ်ယောက်သာပဲ့ 
တောင်ငူမြို့ရဲ့အိမ်ဦးခန်းမှာ
တင့်တယ်စွာကျန်ရှိနေပါပြီ ။
ပုဂ္ဂလိကဘဝမှာဦးနီမွန်ဟာ
ကျနော့်အကိုကြီးမောင်နေနွယ်(ကေတု)ရဲ့
ငယ်သူငယ်ချင်း။
ကျနော့်ရဲ့ဦးကြီး ကျနော့်ရဲ့အုပ်ထိန်းသူ ဆိုလည်း
မမှားပါဘူး ။
စာပေအနုပညာဘဝမှာဆိုရင်လည်း
နေသူအောင်ထက်(အုတ်တွင်း)လို
ကေတုဘုန်းမော်လို
ဦးငြိမ်းဝေ(ကဗျာ့အိုးဝေ)လို
ကျနော့်ရဲ့ခေါင်းကိုင်ဖခင်တဦးပါပဲ ။
မနက်ဖြန်(ဇွန်လ ၁ရက်နေ့)ဟာ
ဦးနီမွန်ရဲ့မွေးနေ့ဖြစ်ပါတယ် ။
ဘယ်နှစ်နှစ်မြောက်လဲဆိုတာတော့
တမင်မေ့ထားလို့မမှတ်မိပါဘူး ။
ကဗျာဆရာဘဝကိုသစ္စာရှိရှိရမ္မက်ကြီးကြီး
ထုဆစ်သူကြီး
ချစ်မေတ္တာနဲ့ဥာဏ်ပညာကိုမျိုးဆက်အသစ်အသစ်များဆီ
လက်ဆင့်ကမ်းရင်း
ဇနီးမယားသမီးများနဲ့ မြေးများမြစ်များနဲ့
ကျန်းမာပျော်ရွှင်ပါစေကြောင်း
မေတ္တာဆန္ဒ ပို့လွှတ်အပ်ပါတယ် ။ ။
မင်းညွန့်လှိုင်
၃၁ မေ ၂၀၁၅
စာကြွင်း
ရန်လင်းအောင်နဲ့ကျနော် ပူးတွဲကဗျာစာအုပ်[ အများဆိုင်နာမ်]မှာ
ထိမိရှင်းလင်းတဲ့အမှာစာချီးမြှင့်ပေးခဲ့တာလည်း
မမေ့နိုင်တဲ့ကျေးဇူးပြုမှုပါပဲ ။
မင်းညွန့်လှိုင်
 |
| ကဗျာဆရာ မောင်နီမွန် ။ မင်းညွန့်လှိုင် ။ ဒဿနေမင်း |
