ဗိုလ်ချုပ်(ငါတို့ရဲ့ထာဝရကောင်းကင်)
----------------------------------------------
written by မောင်သော်တာ
ဗိုလ်ချုပ်ကပြောခဲ့တယ်
အရှုံးကိုလည်း မျှော်လင့်ထား
မျှော်တော်ယောင် သတင်းတစ်ပုဒ်
စုတ်ချက်ညံ့ပန်းချီကားတစ်ချပ်
တိုက်ရိုက်လျှပ်စစ်
ပဒေသရာဇ်သြဇာခံ
အသံပျက်ခေါင်းလောင်းများ
မိုးမှာကြွေသောမိုးမခပင်
စောဒကတက်ဖွယ် ရှေးထုံးများ/
ဗိုလ်ချုပ်ကရယ်ရယ်မောမောပြောဖူးတယ်
မိန်းမယူတာဟာလည်း
နိုင်ငံရေးလှုပ်ရှားမှုတစ်မျိုးပဲ
အတ္တ ဥခွံကိုဖောက်ခွဲခဲ့ကြတယ်
စတုရန်းတစ်ခု/ဒဿဂံတစ်ခု/
ယူဖူးတယ်ရှိအောင် ယူကြည့်လိုက်
ဂျီသြမေတြီနိုင်ငံရေး
ဈေးသုံးလည်းမကြွယ်နဲ့
ဒီနေ့ အကြွေးမရောင်းပါ/မရောင်းဘူး
ဘယ်တော့မှမရောင်းဘူး/ဈေးကြီးတယ်ဆိုတာ
ရောင်းကုန်မဟုတ်တဲ့အရာတွေပါ
ဗိုလ်ချုပ်ပြောတာ မမှားခဲ့ဘူး
ဗိုလ်ချုပ်ပြောတာ မမှားခဲ့ဘူး
အခု/ငါတို့/ဘာနိုင်ငံဖြစ်နေပြီလဲ
ဒဿမကိန်းပုစ္ဆာထဲမှာတလည်လည်
သုညကို သုညနဲ့မြှောက်သလို
ဘီလျံကို သုညနဲ့မြှောက်မလား
အမြောက်တစ်လက်လိုအဆံချောင်မီးခိုးပဲ
ညှော်လိမ့်မယ်
သိပ်ကောင်း--(စိတ်ညစ်ဖို့)
ဗိုလ်ချုပ်ကိုမသနားတဲ့သူ များသလား
ဗိုလ်ချုပ်ကိုအခုရှိနေစေချင်တဲ့အထဲမှာ
ခင်ဗျားရော ပါသလား
မမျှော်လင့်လည်း ရှုံးခဲ့ပြီဗိုလ်ချုပ်ရေ
အရှုံးတွေထဲ
မိုးသားတွေကအပြည့်အသိပ်
သည်ရေမြေ သည်တောတောင်ဆိုတာ
ဗိုလ်ချုပ်ရဲ့အသွေးအသားပေါ်ထွန်ယက်ခဲ့လို့ပါ
ဗိုလ်ချုပ် ရွာချခဲ့တဲ့--မိုး
ဗိုလ်ချုပ်ထွေးပွေ့ခဲ့တဲ့--နွေ
ဗိုလ်ချုပ်ရဲ့ရနံ့နဲ့ သင်းခဲ့တဲ့--နှင်းတွေပေါ့
ဗိုလ်ချုပ်ပြန်မကြည့်လိုက်ပါနဲ့ဒီမြင်ကွင်းတွေ
ဗိုလ်ချုပ်ပြန်မကြားချင်ပါနဲ့ဒီကြေကွဲသံတွေ
ဗိုလ်ချုပ်တို့တုန်းကဘဝတွေထက်
ဇောက်နက်တဲ့ ချောက်ကမ်းပါးကြီးကို
ဗိုလ်ချုပ် လာငုံ့မကြည့်လိုက်ပါနဲ့
ဗိုလ်ချုပ်ရဲ့ စိတ်ဝိညာဉ်နဲ့
ထွက်မြောက်ပျံသန်းခြင်းတောင်ပံကို
ရယူဖို့
ကျွန်တော်တို့ရဲ့ငြိမ်းချမ်းရေးငှက်ငယ်ကို
ဗိုလ်ချုပ်ဆီ ပို့လွှတ်လိုက်ပါပြီ
မကြာမီ
အိုးဝေတွန်ကျူးသံတွေပျံ့လွင့်ဖို့။
မောင်သော်တာ
ီ
No comments:
Post a Comment