အချစ်ရေ လာဟေ့ . . . . .
. . . . . . . . . . . . . . . ရာပြည့်ဆန်းဆီလှမ်းကြမယ်
နတ်ဆိုးတို့ဖုံးကွယ်ခြင်းခံခဲ့ရတဲ့
ဖေဖော်ဝါရီ ၁၃ ရက်မှာ
ဒီတိုင်းပြည်ရဲ့
နှလုံးသည်းပွတ်ဖွားမြင်ရာ
နတ်မောက်မြို့ကလေးက
အညာကျေးလက်အိမ်အိုကြီးဆီ
အရောက်သွားကြမယ်အချစ်ရယ် ။
မြို့လုလင်သာတဲ့ကွန်းဆီသို့
တို့သခင်စာဖွဲ့ညွှန်းလိုက်မကွဲ့
ဒါနဲ့လွမ်းကြပေတော့ကွာ..တဲ့
မဟာကဝိစာအရှိလို
နီစွေးသော
ဗိုလ်မင်းရောင်ရဲ့မြေးလေးဆီ
ရာဇဝင်မြောက်အလွမ်းများနဲ့
တို့သွားကြမယ်အချစ်ရယ် ။
ကြံ့ကြံ့ခိုင်တဲ့ဇာနည်ဘွား
မိခင်ဒေါ်စုသား
ညာတာမကောင်းပါဘူးအမရာတဲ့
မညာတတ်တဲ့အညာသားလေးဆီ
ငါတို့သားနဲ့သွားကြမယ် ။
ကျွန်ပညာအလိုမရှိ
ရေနံချောင်းက
မောင်အောင်ဆန်းတို့ရဲ့
အမျိုးသားကျောင်းမှာ
သခင်ပညာဝံသာနုရနံ့ကို
နမ်းရှိုက်ကြမယ်အချစ်ရယ် ။
ငါ၏ဦးခေါင်းသည်
သွေးဖြင့်ချင်းချင်းနီ၏
သို့သော်ညွှတ်ကားမညွှတ်
အိုးဝေမဂ္ဂဇင်းအယ်ဒီတာရဲ့
အနိုင်မခံတရားကို
နာကြားကြမယ်အချစ်ရယ် ။
မြန်မာပြည်သည်တို့ပြည်
ရဲရဲတောက်အော်သံနဲ့
ပင်နီတိုက်ပုံဝတ်
တို့ဗမာအစည်းအရုံး
အထွေထွေအတွင်းရေးမှူး
သခင်အောင်ဆန်းထံ
သခင်အကျင့်ကိုကျင့်ကြံဖို့
တို့သားကိုအပ်နှံရမယ် ။
ဗမာ့လွတ်လပ်ရေးအတွက်
တပ်မတော်ဖွဲ့ဖို့ဂျပန်ပြည်မှာ
အချစ်ရယ်
တဟီတီမဟုတ်
ဟိုင်နန်ဆိုတဲ့ကျွန်းလေးမှာ
လွတ်မြောက်ခြင်းသို့ချီရာလမ်းကို
ငါတို့ခြေရာခံကြမယ် ။
ရဲရဲတောက်တို့ဗမာတွေ
သတ္တိခဲတွေ
ဗမာ့လွတ်လပ်ရေးတပ်မတော်ရဲ့
သေနာပတိကြီးဗိုလ်တေဇကို
အနီးကပ်ဆုံးရန်သူကိုရှာပြီးတိုက်ကြ
တပ်မှူးကြီးဗိုလ်အောင်ဆန်းကို
အလေးပြုကြမယ်အချစ်ရယ် ။
အိမ်ထောင်ရေးမှာလည်း
အနုပညာရှိတာပဲ
ပဲပြုတ်နဲ့နံပြားရရင်
စားချင်တယ်ကြည်
ငွေသော်တာရောင်ခြည်ရဲ့
ချစ်လှစွာသောခင်ပွန်းဆီမှာ
အိမ်ထောင်မှုအနုပညာကို
ခံစားကြမယ်အချစ်ရယ် ။
အကောင်းဆုံးကိုမျှော်လင့်
အဆိုးဆုံးအတွက်ပြင်ဆင်
ရရင်ရ မရရင်ချ
ဖဆပလဥက္ကဌရဲ့ဥာဏ်အမျော်အမြင်
ဦးအောင်ဆန်းရဲ့ရဲစွမ်းသတ္တိ
အချစ်ရယ်
ငါတို့သားကိုမအအောင်
သမိုင်းပညာသင်ကြားစေရမယ် ။
ဒီမိုကရေစီသာလျင်
မြန်မာပြည်နဲ့အကိုက်ညီဆုံးတဲ့
အမျိုးသားခေါင်းဆောင်က
စည်းကမ်းရှိ ညီညွတ်ပြီး
အမှန်တရားနဲ့ကိုက်ညီတဲ့အင်အား
ထူထောင်ရမယ်တဲ့
လူထုခေါင်းဆောင်က
အချစ်ရေ..
လှမ်းပါစို့ကွယ့်
ဆန်းရာပြည့်မှာ
တရားမျှတလွတ်လပ်ခြင်းနဲ့မသွေ ။ ။
မင်းညွန့်လှိုင်
No comments:
Post a Comment