Wednesday, March 25, 2015

မင်းညွန့်လှိုင် မွေးနေ့ ( အမှတ်တရ )

အဝိဇ္ဇာပေါင်တစ်ရာတိတိ
----------------------
နွေဥတုမှာဆိုက်ကပ်ခြင်း
-----------------------

( ၁ )
* ငါက ကဗျာနဲ့တွေ့ရင်
ဒီ့ထက်အသက်ပိုမကြီးတော့ ။

( ၂ )
စယ်လီဘရစ်တီမဟုတ် ဂွတ်မစ်ဇာမဟုတ် ယူရိုပီယန်ဆန်သူ
လည်းမဟုတ်လေတော့ မွေးနေ့ဆိုတာ ဆံသာကေဖြတ်မပြု
အပ်တဲ့နေ့တစ်နေ့လို့ပဲမှတ်သားခဲ့တာပါပဲ ။
ပျိုရွယ်စဉ်အခါကမွေးနေ့ကိုအကြောင်းပြပြီး သန်းထိုက် နေမျိုး ဇော် မိုး ကျော်မိုးလွင်တို့နဲ့ထန်းရည်စုသောက်ခဲ့ဖူးတာကလွဲလို့ပေါ့လေ။
( ၃ )
ဘဝမှာပထမဆုံးသိဖူးတဲ့မွေးနေ့ကိုပြောရရင်...
ငယ်ငယ်လေးကတည်းကစွဲလန်းခဲ့ဖူးတဲ့ဒဂုန်တာရာရဲ့"ဒို့ခေတ်ကို
ရောက်ရမည်မှာမလွဲပါ"ဝတ္ထုကြီးထဲကဇာတ်ဆောင်ကောင်မလေး(ခင်
ထားလှိုင်ထင်တယ်)ရဲ့အနောက်တိုင်းဆန်တဲ့မွေးနေ့ပွဲပါပဲ ။
( ၄ )
ကျနော်တို့ရှေ့ကလမ်းမကြီးတလျှောက်မှာတော့ ဗုဒ္ဓ ခရစ်တော်
မှိုင်း ဆန်း တာရာ နဲ့ လူထုအမေတို့ရဲ့မွေးနေ့ကြီးတွေက
အများဆိုင်နာမ်တွေအဖြစ်အစီအရီထွန်းညှိခဲ့ကြပါပြီ ။
( ၅ )
မွေးနေ့ပွဲကျင်းပတာဟာအစဉ်အလာယဉ်ကျေးမှုမဟုတ်ဘူး ဆိုပေမယ့်
ဆရာဒဂုန်တာရာ ဆရာမကြီးလူထုဒေါ်အမာတို့ရဲ့မွေးနေ့ပွဲတွေကတော့
့ အဖိနှိပ်ခံစာပေအနုပညာရှင်များ
ရဲ့ကွန်ဂရက်တွေသဖွယ်ဖြစ်ခဲ့ကြပါတယ်။
ဒါဟာလည်းဒို့တိုင်းဌာနီကြီးရဲ့ထူးခြားမှုတွေထဲကတစ်ခုပေါ့ ။
( ၆ )
ကိုယ့်မွေးနေ့ကိုရေးကြီးခွင်ကျယ်မလုပ်ခဲ့ဘူးဆိုပေတဲ့ မုခဘုတ်အုပ်က
တော့ သူငယ်ချင်းများကိုမှတ်မှတ်သားသားသတိပေးတတ်ပြန်တယ် ။
( ၇ )
ဆုတောင်းတွေပြည့်ဝလိမ့်မယ်လို့မယုံကြည်ခဲ့ပါဘူး ။ဆုတောင်းပေးသူ
တွေရဲ့မေတ္တာဓာတ်ပြည့်ဝမှုကိုသာပြည့်ပြည့်ဝဝယုံကြည်မိပါတယ် ။
ဆုတ်ခွာလာတဲ့လတစ်စင်းလိုမွေးနေ့အကြိမ်ရေများလာလေလေ
လက်ကျန်အချိန်တွေနည်းလာလေမို့ရှေးကထက်ပိုချစ်ကြပါစို့ရဲ့ ။
( ၈ )
* ငါ့မွေးနေ့မှာ
ငါတစ်ယောက်တည်းတက်ရောက်ကျင်းပ
နယ်ပယ်အသစ်ရှာတဲ့ကိုလံဘတ်ကို
ဘယ်ဘက်တစ်ခွက်
ညာဘက်တစ်ခွက်ငှဲ့ခွက်ချင်းတေ့
ငါဆုတောင်းစကားဆိုပေးတယ်
ကဗျာဆရာ
သက်တော်ရာကျော်ရှည်ပါစေ
ချီးယား...။ ။

                            မင်းညွန့်လှိုင်
                        ၂၆ မတ် ၂၀၁၅

*ကဗျာဆရာအောင်လွန်းမြိုင်ရဲ့"ကဗျာဆရာ့မွေးနေ့"ကဗျာထဲက
စာကြောင်းတချို့ကိုစွဲလန်းစွာကူးယူထားပါတယ် ။
ကိုသီရေ ခွင့်လွှတ် ။

ccbb



No comments:

Post a Comment